Araba Market: Araba landatarra biziberritzen

16.000 bonu baino gehiago salduta, herritarrek eta bisitariek oso harrera ona egin diote landa-inguruneko produktu eta zerbitzuen zuzeneko kontsumoa bultzatzeko proposamen instituzionalari.

Azken fenomenoek, COVID-19aren pandemiak, besteak beste, edo despopulazioak, hain berria ez denak, kalteak eragin dituzte herri txikienetako enpresa-sarean. Azalera handiak ugaritzeak, onlineko salmentaren leherketak eta osasun-krisiak eskatutako mugikortasun-murrizketak min handia egin diete Arabako landa-eremuko negozio txikiei, eta are larriagoa da haien egoera, berez delikatua dena.

Hori arintzeko, Arabako Foru Aldundiak, Vital Fundazioak eta lurraldeko Zazpi Kuadrillek Araba Market sortu dute. Web-plataforma honek erakusleiho gisa balio du, eta establezimendu horiek harpidetza doan egin, beren jarduerak proiektuaren sare sozialen bidez zabaldu, eta deskontu-bonuen programa batean harpidetu daitezke.

Programa honek zuzeneko kontsumoa sustatu nahi du, saltzaileari eta kontsumitzaileari mesede eginez: 20 euroko erosketa bakoitzeko, bezeroak 12 baino ez ditu ordaintzen, eta Araba Marketek hartzen du hartzen du bere gain gainerakoa. Foru Aldundiak eta Vital Fundazioak beren gain hartzen dute aldea, eta negozioari 20 €ordaintzen dizkiote establezimenduan trukatutako bono bakoitzeko. Gaur egun, 251 establezimenduk eman dute izena web plataforman eta 175k, gainera, bonu programan parte hartzea erabaki dute. Arrakasta handia eduki du, 16.000 bonu baino gehiago saldu dira dagoeneko, eta dozenaka negoziok establezimendu bakoitzeko baimendutako gehieneko kupoiak agortu dituzte.

Herri biziak 

Araba Market ekimenak jarduera ekonomikoa sustatu nahi du landa-ingurunean, bide batez produktuak eta zerbitzuak zuzenean eskaintzen dituzten familiei lagunduz. Bonu-sistemaren helburua da 5.000 biztanletik beherako herrietan kontsumoa suspertzea, hiri-jatorriko merkataritza-fluxuetatik kanpo gera ez daitezen. Ekimenak bi helburu ditu: alde batetik, ekoizle eta profesional txiki horiei kanal digital bat ematea beren burua sustatzeko, beren jarduerei ikusgarritasuna emateko eta fakturazioa handitzeko, eta, bestetik, Arabako landa-bizitza sustatzea, ekiteko eta lan egiteko ingurune ezin hobea izan dadin, erronka demografikoari aurre egiteko eta herri horiei bizitza emateko. 

Negozioak Araba Market doako plataformara inskribatu daitezke, webgune honetan izena emateko inprimakia betez, eta, nahi izanez gero, bezeroentzako %40ko deskontua egiten duen bonu-sistemaz baliatu daitezke. Gainera, belaunaldien arteko eten digitala eta geografikoa murrizteko, proiektuak erabiltzaileari arreta emateko telefono bat du, harpidetza egiteko behar diren urratsetan gidatzeko: 945 217 210. Hori guztia, tradizioa eta berrikuntza uztartzen dituen eta betiko dendak eta hiria lasaitasunagatik eta bizi-kalitateagatik aldatzeko prest dauden ekintzaileen negozioak hartuko dituen ingurune bat sustatzeko.

Eskaintza handinahia eta kalitatezkoa

Moda jasangarriaren diseinua, fisioterapia, estetika eta edertasun aretoak, ezkutuko lekuetako ihes-gelak, animalien ongizaterako eta ondare arkeologikoa berreskuratzeko zentroak, haurrak elikadura-ohitura osasungarrietara hurbiltzeko haurrentzako tailerrak, nekazaritza ekologikoko produktuak, enogastronomia, etxeko janaria eskaintzeen duten jatetxe eta tabernak, astebururako xarma duten ostatuak, ardi latxaren gazta eta ogi ekologikoa eskuz egitea, Ekialdeko Asiako Shiitake perretxiko zoragarriaren laborantza... Araba Marketek sustatzen dituen jardueren adibide bat besterik ez da hau.

Eskaintza askotarikoa eta anbizio handikoa da, bai bizilagunentzat, bai hiriko bisitarientzat. Aipatzekoak dira lurreko produktu izarrak, hala nola Arabako patata, babarrun pikarta, perretxikoa, boilur beltza, Idiazabal gazta, Gesaltza Añanako gatza, Gorbeiako eztia edo metodo tradizionalekin hazitako moxal eta behi haragi zaporetsuak. Horiez gain, nazioartean ospetsuak diren ardoak daude: Arabako Errioxako eta Txakolineko ardoak eta Idiazabal gazta, Europako Sukaldaritza Ondare izendapena duten produktuen zerrenda hautatuan parte hartzeko ohorea duena. Erakusleiho birtual horretan sustatutako produktu eta zerbitzu bakoitzaren atzean familia bat eta kontatu beharreko istorio bat daude, eta mimoz zabaltzen da Araba Marketen webgunean eta sare sozialetan, benetako protagonistei ahotsa emateko. 

Erakunde babesleek "Ekin Araban" programarekin itxi dute Araba Marketen apustua, 2015 eta 2019 artean lurraldean sortutako ekintzailetzaren %80 islatzea lortu baitu. Horrela, mila enplegu salbatu dira, osasun-krisia eta horren ondoriozko dezelerazio ekonomikoa gorabehera. Edozein laguntza ongi etorria da beren dedikazioarekin eta lan egokiarekin Arabako geografiako herri baliotsuak bizirik mantentzen dituzten pertsona horiei eusteko.